۱۳۹۲ فروردین ۲۶, دوشنبه

ئەو ژنەی بێباكانە بەرەو پەتی سێدارە رۆیی

نوشته شده در پنجشنبه دهم تیر 1389 ساعت 10:12 شماره پست: 149
 
 
 

5 كەس لە باشترین رۆڵە خەباتكار و تێكۆشەرەكانی رێگەی ئازادیی ئێران و كوردستان، ئێعدام دەكرێن. بە داخەوە هەواڵی ئێعدام و شكەنجە و زیندان و دەربەدەری وا لە گەڵ ژیانی رۆژانەماندا تێكەڵاو بووە كە ئەم هەواڵانەمان بۆ ئاسایی بووە و دەڵێی شتێكی وا نەقەوماوە. بەڵام كارەساتە! كارەساتە ئینسانەكان لە سەر ئازادی و بە ئازادی ژیان، گیانیان ڵێ دەسەندرێ، بەڵام لانی كەم بۆ ئێمە ئازادیخوازان ئەم هەواڵە تاڵانە نەك نابێ بێ هیوامان بكا بەڵكوو دەبێ سوورترمان بكا لەسەر خەبات و درێژەدانی رێگەی ئەوانەی كە لە رێی ئازادیی و بەختیاری ئینسانەكاندا گیانیان فیدا دەكەن.
19ی بانەمەڕی 1389 یەكێكی دیكە لە رۆژە ماتەمبارەكانی كوردستان بوو. سەرلە بەیانی رۆژی یەكشەممە 19ی بانەمەڕ بڵاو بوونەوەی هەواڵی دڵتەزێنی ئێعدامی 5 تێكۆشەری رێگای ئازادی و ئینسانییەت هەموو ئازادیخوازێكی ماتەمبار كرد. شەهیدەكان بریتی بوون لە: شیرین عەلەم هولی، فەرزاد كەمانگەر، فەرهاد وەكیلی، عەلی حەیدەریان و مەهدی ئیسلامیان، كە چوار كەسی یەكەمیان لە رۆڵە خەباتكارەكانی كوردستان بوون. یەكێك لەو چواركەسەش ژنێكی خەباتكار بوو كە لێرەدا جێی خۆیەتی ئاوڕێك لە ژیان و بەسەرهاتی بدەینەوە و شانازی بە پێگەیشتوویی و ئازایەتی ئەوەوە بكەین كە لە ئاست شكەنجەگەراندا چۆكی دانەدا و بێباكانەی بەرەو پەتی سێدارە رۆیی. بوونی ژنێك لە نێو ئەو ئێعدام كراوانەدا ئەوەندەی دیكە نفرەت و بێزاریی لە رێژیمێكی دژی ئازادیی و ئینسانییەت زیاد كردوە. ئاخەر تاوانی ئەو ژنە چی بوو جگە لەوە ژیانی خۆش دەویست و بۆ ژیانێكی بەختەوەرانە رێگەی خەباتی گرتە بەر؟ 
با بزانین ئەو ژنە كێ بوو؟
شیرین عەلەم هولی
 
 بە وتەی خانمی جیلوە جەواهری كە هاوبەندیی شیرین بووە، دەڵـێ "شیرین عاشقی ژیان بوو، زۆری عەلاقە بە خوێندنەوە و چیرۆك نووسین بوو، ئەو خەباتكارێكی رێگەی ئازادی و یەكسانی بوو، بە گیان و دڵ هەستی بە مەسەلەكان كردبوو". یەكێكی دیكە لە هاوبەندییەكانی شیرین دەڵـێ: "كاتێك هاتن بیبەن لەسێدارەی دەن، ئەو لەوكاتەدا خەریكی خوێندن و خۆئامادەكردن بوو بۆ ئیمتیحانات كە دەیویست چەند رۆژێكی دیكە ئیمتحانی دەرسی بیركاری پۆلی پێنجەمی سەرەتایی بدات، ئاخەر ئەو قەولی بەخۆی دابوو بخوێنێ و بچێتە زانكۆ و لە داهاتوودا ببێتە پارێزەری رۆڵە بێمافەكانی وڵاتەكەی."
 
مەلائیكە عەلەم هولی باس لە ژیانی شیرین دەكا:
شیرین عەلەم هولی لە سیانزەی جۆزەردانی 1360ی هەتاوی لەگوندی دیم قشڵاقی ماكۆ لەخێزانێكی فرە منداڵدا چاوەكانی بە ژیان هەڵێنا. منداڵی گەورەی ماڵ بوو. بەهۆی ئەوەوە كە دایكی نەخۆش بووەء منداڵی وردیشیان زۆر بووە، شیرین هەر لەمنداڵییەوە بەرپرسیاریەتی قورسی كەوتۆتە سەر شان و بووە بە هاوكاری دایكی و لە پەروەردە كردن و گەورەكردنی خوشك و براكانی دا شەریك بووە، بەشایەدیی ئەندامانی بنەماڵەكەی شیرین كەسایەتییەكی ئازا، چاونەترس و فیداكار بووە. ئەو ئەرك بەرپرسیاریەتییەش بۆتە هۆی ئەوە كە بە داخەوە لەخوێندن بێبەش بێت، بەڵام كاتێك گەورە تر دەبێ و هەست بەم كەلێنە لە ژیانیدا دەكا، سەرباری هەموو ئەرك و بەرپرسیاریەتییەكان، دەچێتە قوتابخانەی گەورەساڵان و دوو ساڵ دەخوێنێ.
لە وڵامی ئەو پرسیارەدا كە چۆن بوو شیرین رێگەی خەباتی هەڵبژارد؟
 خاتوو مەلائیكە پووری شیرین، دەڵـێ:
 ناوچەی دێم قشڵاق كە دەكەوێتە سەر رووباری ئاراس هاوسنوورە لەگەڵ ئازەربایجان و توركیا، واتە ناوچەیەكە كە سێ سنوور بەیەك دەگەن و ناوچەكەیان بەشێكە لە سنووری باكوور و رۆژهەڵاتی كوردستان، ئەو كاتە گەریلاكانی پەكەكە لەو ناوچانەدا زۆر لەهاتوو چۆدا بوون و زۆریش تێكەڵ بەخەڵكی ناوچەكە ببوون، خەباتی ئەوان و تێكەڵاوییان لەگەڵ خەڵكی ناوچەكە و بە تایبەتی بوونی كچانی تێكۆشەر لە ریزەكانی ئەواندا، ئەو هۆكارانەن بوون كە شیرین هەستی خەباتكاری تێدا بەهێز ببێ. لەلایەكی دیكەوە بەهۆی كولتووری زاڵی خێڵەكی لەناوچەكەیاندا كە ژن بارێكی قورسی لەسەر شانە و بواری چەوساندنەوەی ژن زۆر لەبار بووە، تەنانەت زۆر جار ژنان بەهۆی ئەو گوشارانەوە پەنایان بردووەتە بەرخۆسوتاندن و خۆ كوشتن، شیرین وەك كچێكی وریای پێگەیشتوو كاتێك پێشتر ئاشنای شۆڕشی كوردستان دەبێتء ناشخوازێت ژیانی وەك زۆربەی ژنەكانی دیكە لەژێر گوشار و چەوساندنەوەدا بەسەر ببات، بڕیار دەدات رێگایەكی جیاواز تر بگرێتە بەر، چونكە شیرین لەو بڕوایەدا بووە ژنیش دەتوانێت شانبەشانی پیاو شۆڕش بكات، بۆیە ساڵی 1385 دەچێتە نێو ریزەكانی پارتی ژیانی ئازاد (پەژاك).
شیرین لە ریزی خەباتیش دا خولیای زۆری بۆ خۆی دروستكردووە و بەشایەدیی هاورێكانی هەمیشە بەدوای كار و خۆپێگەیانددا بووە. پاش ماوەیەك شیرین بۆ كارێكی پێویست دەچێتە تاران كە بەداخەوە پێش ئەوەی بگەرێتەوە نێو هەڤاڵانی لە جۆزەردانی 1387دا لە لایەن ئیتلاعاتییەكانەوە دەستگیر دەكرێ. بۆ ماوەی 25 رۆژ لەبارەگای ناوەندیی ئیتلاعاتی سپای پاسدارن لەتاران لە ژێر ئەشكەنجەی قورسی جەستەییء دەروونیدا بەسەر بردوە، لەو ماوەیەدا سەرباری ئەشكەنجەی قورس و گوشاری لەرادەبەدەر 22 رۆژ مانی لە خواردن گرتووە، ئەشكەنجەكەرەكان چەندین جار هەوڵیاندابوو مانگرتنەكەی پێ بشكێنن و بەزۆر خواردنی پێ بدەن، بەڵام لەوەشدا سەركەوتوو نەبوون، چونكە هەر كاتێك بەزۆر سورومیان كردووە بە قوڕگیا تاكو خواردنی پێبدەن سوورومەكەی لەقوڕگی راكێشاوەتە دەرەوە و رێگای نەداوە مانگرتنەكەی پێ بشكێنن، پاش ئەو ماوەیە دەدرێتە بەندی 209ی زیندانی ئێوین، كە راستەوخۆ لەلایەن وەزارەتی ئیتڵاعاتەوە بەڕێوە دەبرێت، سەرەتا بەهۆی ئەوەی كە جەستەی نیوەگیانە، بەڕێوەبەرانی زیندانی ئێوین ئامادە نابن وەریبگرن، بەڵام رۆژێك دواتر لەسەودایەكی شاراوەدا بڕیاری وەرگرتنی لەلایەن بەڕێوەبەرانی زیندانی ئێوینەوە دەدرێت.
پاش شەش مانگیش مانەوە و لێكۆڵینەوەی بەردەوام لەبەندی 209 و چەندین جار هەڕەشەی مەرگ و كوشتنی لێدەكەن و چەندین شێوازی ئەشكەنجەی جەستەیی و دەروونیی لەدژ بەكار دەهێنن، ئەوەی كە جێگای سەرنجە بۆ ماوەی شەش مانگ بەرپرسان و بەڕێوەبەرانی دەزگا زەبەلاحەكەی ئیتلاعات نەیزانیوە ناوی راستەقینەی شەهید شیرین چیە، چونكە شیرین خۆی بە (فریشتە ئەمیری) دەناسێنێت و ئەوەش شەش مانگی پێدەچێت تاكوو بەرپرسانی ئیتلاعات بزانن كە ناوی راستەقینەی خۆی چییە. كاتێكیش دەگوێزرێتەوە بۆ بەشی ژنانی زیندانی ئێوین هەر بەناوی فریشتە ئەمیری دەناسرێت و بۆ ماوەی ساڵێكیش هەر بەو ناوەوە لەناو هاو زیندانیەكانیدا بانگی دەكەن.
لەبەرواری 28ی سەرماوەزی 1388دا لە لقی 15ی دادگای شۆڕشی تاران، كە لە لایەن دادوەر (سەڵەواتی)یەوە بەڕێوە چووە، بە تۆمەتی بەزاندنی سنوور دوو ساڵ سزای بۆ بڕدرایەوە و بە تۆمەتی موحاربە (دژایەتیكردنی خوا) لە رێگەی پەیوەندی لەگەڵ (پەژاك)دا بڕیاری لەسێدارەدانی بۆ دەردەكرێ.
بڕیارەكە لە 13 بەفرانباری (1388)دا بە پارێزەرەكەی راگەیەندراوە، چونكە رەوتی لێكۆڵینەوەی دۆسیەكە لەدادگای سەرەتایدا لەدەرەوەی بنەما یاساییەكان بووە، پارێزەرەكەی شیرین داوای سەرلەنوێ پیاچوونەوە بە بڕیارەكەدا پێشكەشی دادگا كردبوو، بەڵام تاكوو ئێستاش كە شیرین لەسێدارە دراوە هیچ وەڵامێك بەو داوایە نەدراوەتەوەء هیچ بڕیارێكیش تاكوو ئێستا لەدیوانی باڵای دادوەریی ئێرانەوە سەبارەت بەو دۆسیەیە بە پارێزەر بنەماڵەكەی رانەگەیەندراوە.
لە 29ی بەفرانباری 1388دا پاش دەركردنی بڕیاری لەسێدارەدانی ئەو كچە تێكۆشەرە، لە دادگای شۆڕشی تاران، كەمپینی تا هەڵوەشاندنەوەی بڕیاری لەسێدراەدانی شیرین عەلەم هولی لەلایەن كۆمەڵێك چالاكوانی مافی مرۆڤەوە دامەزرا. ئەو كەمپینە بە كۆكردنەوەی واژۆ هەرچەند نەیتوانی پێشی ئێعدامی شیرین بگرێ بەڵام توانی دەنگی شیرین بگەیەنێتە رای گشتیی جیهان.
پاش ئەوەی كە كەمپەینەكە بەشێوەیەكی بەرفراوان دەنگی ناو بەندیخانەی ئەوینی تارانی دەگواستەوە كاربەدەستانی كۆماری ئیسلامی ئەوەیان پێ قبوڵ نەكرا و وێبلاگی كەمپەینەكەیان فیلتەر كرد و لەناوەوەی ئێران وێبلاگەكەی شەهید شیرینیش نەدەكرایەوە، بەڵام سەرباری ئەوەش ئەو كەمپنە لەپێناو ئازادیی شەهید شیریندا دەستبەرداری ئەرك و چالاكییەكانی نەبوو.
لەماوەی زینداندا شیرین توانیی دوو نامە بۆ رای گشتی جیهان بنووسێت و لەو دوو نامەیەدا زۆر وردەكاریی ئەشكەنجەء زوڵمی لێكۆڵەرەوەكان و كرداری دژە مرۆییانەی كارەبەدەستانی ئاشكرا كرد.
دەربارەی چۆنیەتی باسكردنی شەهید شیرین لەناو خەڵك و ناسراوەكانیدا، جێگەی خۆیەتی ئاماژە بۆ ئەوە بكەم كە تاكوو ئەو چركە ساتە هەموو كەس و دۆست و خزم و ناسراوەكان وەك كچێكی تێكۆشەری رێگای رزگاریی گەلی كورد باسیان كردووە، چونكە بۆ هەموو لایەك روون بوو كە شیرین لەپێناوی چ ئامانجێكدا چووەتە سەر شاخەكانی كوردستان و لەپێناوی ئەو ئامانجەدا ژیانی خۆی كردە دیاریەك بۆ كوردستان.
لەبەرەبەیانی نۆزدەی گوڵانی 1389 لەزیندانی ئێوینی تاران لەگەڵ چوار تێكۆشەری دیكە (فەرزاد كەمانگەر، عەلی حەیدەریان، فەرهاد وەكیلی، مەهدی ئیسلامیان) كە سێیانیان كورد و یەكێكی دیكەیان فارس بوو لەسێدارە دران. ئەو رۆڵە تێكۆشەرانەی كوردستان بەدەم خوێندنەوەی سروودی ئەی رەقیب گیانیان پێشكەشی رێگای ئازادی كوردستان كرد.
 
 

هیچ نظری موجود نیست:

ارسال یک نظر